ගැබුරු අඳුර වසා ගත් සක්මන් මලුවේ අන්තයයේ වන කුඩා අස්න මත අසුන් ගත් අප දෙදෙනා දොඩමලු වෙමින් සිටින්නෙමු. ඔහුට පවසන්නට බොහෝ දේ ඇතුවා සේය. දර්ශනය පිලිබද කථිකාචාර්යවරියක වන ජර්මානු ජාතික බිරින්දෑ ගැන, උසස් අධ්‍යාපනයට පිවිසෙමින් සිටින දරුවා ගැන , අතොරක් නැතිව බොහෝ දේ පවසමින් සිටී. භාෂාව අවසන් වන තැන නිහඬ බව පටන් ගනී.අනන්ත අර්ථ ඇති නිහඬතාවය භාෂාවට වඩා බරපතලය.
පහලින් ඇසෙන කඩා හැලෙන දිය කඩිත්තේ හඩ භාෂාවේ නැවතුම වෙනස් අර්ථයකින් පුරවන්නට සුදානම්ව සිටින්නා සේය.ඉද හිටකින් අදුර මැදින් මතුවන කනාමැදිරි ආලෝකය ජීවිතය පිලිබද වෙනස් අරුතක් පවසනවා සේය.අප දෙදෙනා දෙබසකින් තොරව බොහෝ වේලා සිටින්නට ඇත. සමාන රිද්මයන් ඇති මිනිසුන් දෙදෙනෙකුගේ හමුවීම අපූර්ව අත්දැකීමකි. කඳුවලලු කිහිපයකට එහායින් වන සමාජ ජීවිතය මොන තරම් ප‍ටු අත්දැකීමක්දැයි මනස විමසයි.කාලය බොහෝ දේ වෙනස් කර ඇත. (අනන්තය තෙක් පෙනෙන විසල් කඳු මුදුනතක සිට)
